2016年2月7日星期日

猴年行大運



2月4日立春,送羊迎猴。嗰日,我就走咗去金山公園影下馬騮應下節,順便去埋九龍水塘行番個大運。

講起馬騮,就不得不講西遊記裡面嘅齊天大聖孫悟空。我地廣東人叫大聖爺做馬騮精。百厭嘅細蚊仔,我地又會叫佢做馬騮仔,呢個叫法,又真係好貼切,因為馬騮仔無時停,成日走圍跳。講到呢到,突然諗起粵語長片黃飛鴻電影系列中,黃師父就成日碌大佢對眼閙佢班徒弟:「你地呢班馬騮又出去闖禍....」嗰時,我真係以為黃師父就係黃飛鴻,後尾先知佢真名係叫關德興。講下講下講到無雷公咁遠!

羊年年尾,又濕又凍,攪到人都無晒心機。估唔到一立春。即刻見到好溫暖嘅太陽。我一路行入水塘,一路見到啲馬騮走出嚟曬日頭,單拖嘅又有,三五成群又有,雙雙對對嘅又有。我起初都唔敢走咁埋去影班馬騮,不過,行咗一陣,我覺得九龍水塘呢邊嘅馬騮好純良,真係好得人鍾意㗎!

點解我無端端用廣東話寫卜文,因為我係廣東人,想守護我地嘅廣東話囉!我仲要話俾阿松知,廣東話係我嘅母語,我身邊嘅人都係講廣東話囉!















發佈留言